DİN şaxtalı hava ilə əlaqədar gücləndirilmiş iş rejiminə keçib - Baku TV

Ölkə ərazisində, xüsusilə dağlıq rayonlarda soyuq və şaxtalı hava şəraiti müşahidə olunur.

Bununla əlaqədar Fövqəladə Hallar Nazirliyi əhaliyə müraciət edib.

Nazirlik xüsusilə dağlıq ərazilərdə yaşayan, eləcə də dağlara səfər edən vətəndaşlara şaxtalı havada mümkün qədər yaşayış məntəqəsini tərk etməməyi, belə bir zərurət yarandıqda hərəkət istiqaməti barədə yaxınlarını əvvəlcədən məlumatlandırmağı tövsiyə edib.

Qar uçqunu ehtimalı olan yerlərdən, o cümlədən dik yamaclardan kənar gəzmək və günün qaranlıq vaxtına qalmadan yaşayış məntəqəsinə geri dönmək məsləhət görülüb.

Şaxtalı hava şəraiti ilə əlaqədar polis əməkdaşları isə gücləndirilmiş iş rejiminə keçib.

Daxili İşlər Nazirliyindən verilən məlumata görə, yol hərəkətinin təhlükəsizliyinin təmin olunması, sürücülərə və piyadalara köməklik göstərilməsi məqsədilə polis əməkdaşları xidmətlərini fasiləsiz şəkildə həyata keçirirlər.

Hərəkətin təhlükəsizliyi təmin edilir və köməyə ehtiyacı olan hər kəsə xidmətə cəlb edilən əlavə polis naryadları tərəfindən lazımi köməkliklər göstərilir.