Diyetoloqların köməyi olmadan necə arıqlamaq olar?

Çəki artımı qlobal problemlərdən birinə çevrilib. Buna görə də bəzi idmançılar və diyetoloqlar arıqlamaq vədi ilə pul qazanırlar. Lakin axşam yürüşləri və düzgün qidalanma ilə onlardan asılılığı azaltmaq olar.

Kolorado Universitetinin alimlərinin fikrincə, həftədə üç gün dövri aclıq gündəlik kalori hesablamaqdan daha effektiv çəki itirməyə kömək edir. Tədqiqatda artıq çəki və ya piylənmədən əziyyət çəkən 175 yetkin insan iştirak edib. Onlar iki qrupa bölünüblər.

Birinci qrup modifikasiya edilmiş aclıq rejimini saxlayıb. Həftədə üç gün (ardıcıl olmayaraq) iştirakçılar adətən qəbul etdiklərindən 80% daha az kalori qəbul etməli idilər. Qalan günlərdə könüllülər ciddi məhdudiyyətlər olmadan qidalanıblar.

İkinci qrupdakı sınaq iştirakçıları isə hər gün klassik kalori defisitinə riayət ediblər. Qeyd olunur ki, bütün iştirakçılar idman zalına pulsuz abunələr alıblar. Onlara həftədə ən azı 300 dəqiqə idmanla məşğul olmaq tövsiyə edilib.

Hər iki qrup qəbul edilən kalorini izləmək üçün tətbiqlərdən istifadə etməyi öyrənib.

Könüllülərə həmçinin gündəlik kalorinin 55%-ni karbohidratlara, 15%-ni zülallara ayırmaq, qalan 30%-ni isə yağlardan almaq məsləhət görülüb. Könüllülər bir il ərzində pəhrizə riayət ediblər.

Eksperimentin sonunda birinci qrupdakı iştirakçılar gündəlik kalori məhdudiyyəti olan qrupla müqayisədə orta hesabla bədən kütləsinin 7,6%-ni itirib, ikinci qrupda isə bu göstərici 5% olub.

Üç günlük interval aclığına riayət edənlərdə həmçinin bir neçə kardiometabolik göstəricilərdə daha əlverişli dəyişikliklər müşahidə edilib. Xüsusilə, belə qidalanma sxemi sistolik arterial təzyiqi azaltmağa, xolesterin və acqarnına qan qlükozası səviyyələrini normallaşdırmağa kömək edib.