Elçin Əfəndi Gəncədə məktəblinin bıçaqlanmasından danışdı

"Kişi müəllimlərin say azlığı ilə bağlı dəfələrlə çağırış etmişik. Təəssüf ki, hazırda məktəblərdəki müəllimlərin 80%-ni qadınlar təşkil edir".

Bu sözləri təhsil eksperti Elçin Əfəndi deyib. Gəncədə orta məktəbdə 11-ci sinif şagirdinin yaşıdı tərəfindən bıçaqlanması narədə danışan ekspert hesab edir ki, qadınlarda olan analıq instinkti neqativ halların qarşısının alınmasında maneə törədir:

"Xüsusilə də ibtidai siniflərdə gender bərabərliyi kəskin şəkildə pozulub və nəticə etibarilə kişi müəllimlərin sayı azalıb.

Kişilərin təhsil prosesində olmamasının nəticəsini hazırda görürük. Təhsil müəssisələrində rəhbərlərinin böyük əksəriyyəti də xanımlardır. Əvvəlki dövrlərdə isə kişi müəllimlərin sayının çox olması neqativ hadisələrin qarşısının alınmasına kömək edirdi. Qadın müəllimlərdə analıq instinkti baş qaldırdığı üçün bəzi məsələlərə daha yumşaq yanaşırlar. Bəziləri də öz vəzifəsini itirməmək üçün neqativ halları ört-basdır etməyə çalışır və nəticə etibarilə də məsələ həll olunmadan qalır, neqativ halların da miqyası böyüyür".

Ekspert ölkəmizdə fəaliyyət göstərən kişi müəllimlərin sayının az olmasını iqtisadi amillərlə də əlaqələndirib. Onun fikrincə, kişilər maaş azlığına görə başqa sahələrə üz tuturlar:

"Bu məsələdə əsas problem əməkhaqqıdır. Nə qədər ki, Azərbaycan müəllimi ən az millət vəkili qədər əməkhaqqı almayacaq, o vaxta qədər də kişi müəllim çatışmazlığı olacaq. Ümumiyyətlə, istər kişi müəllim, istər qadın müəllim olsun, bu gün əməkhaqları çox aşağıdır. Əməkhaqqı və keyfiyyət bir-birindən asılıdır".

Qeyd edək ki, hazırda Azərbaycanda 22 mindən çox kişi, 121 mindən çox isə qadın müəllim olduğu bildirilir.