Elektron siqaret bədəni belə məhv edir! - Veypin istifadəsi qadağan ediləcək?

Quru öskürək, nəfəs darlığı, döş qəfəsində ağırlıq və halsızlıq kimi simptomlarla həkimə müraciət edənlərin sayı artıb.

Mütəxəsislər deyirlər ki, bu hal daha çox elektron siqaret istifadə edənlər arasında müşahidə edilir. Veypdən istifadə “popkorn” xəstəliyinə səbəb ola bilər.

Baku TV mövzu ilə bağlı elektron siqaret istifadəçiləri arasında sorğu keçirib. Vətəndaşlar veypin ziyanları barədə xəbərdar olsalar da, ondan imtina etmək fikrində olmadıqlarını bildiriblər.

“Hər gün çəkirəm. Ziyanlarından xəbərim var. Amma yenə də istifadə edirəm. Çünki tələbəyəm, çox əsəbi oluram”, – elektron siqaret istifadəçisi deyib.

Qeyd edək ki, 39 ölkədə veypin istifadəsi qadağan edilib. 82 ölkədə isə yalnız ciddi tənzimləmələr əsasında elektron siqaretin satışına icazə verilir. Maraqlıdır, bu qədər zərəri olan vasitənin satışı ölkəmizdə də qadağan edilə bilərmi?

“Sərt qadağanedici tədbirlər daha ağır nəticələrə səbəb ola, başqa maddələrin qəbuluna yol aça bilər. Maarifləndirmə işlərinin həyata keçirilməsi daha məqsədəuyğundur”, – millət vəkili Müşviq Məmmədli bildirib.