Ermənilər Qaragöl ətrafında Rusiya hərbçilərini güllələdi
Martın 21-dən etibarən erməni mənbələri Azərbaycan Silahlı Qüvvələri tərəfindən erməni müqaviləli hərbçinin guya oğurlanması, o cümlədən rus hərbçilərinin guya hərbçilərimiz tərəfindən yaralanması-öldürülməsi mövzularını təbliğ etməyə çalışır.
“Caliber”in hərbi mənbələrdən aldığı məlumata görə, martın 21-də saat 14:00 radələrində Rusiya hərbçiləri ordumuzun nəzarətində olan ərazilərdə itkin düşə biləcək erməni hərbçilərlə bağlı Azərbaycan tərəfi ilə əlaqə saxlayıb. Azərbaycan tərəfi erməni əsgərinin tapılmadığını bildirib və bu istiqamətdə yerləşən postlarımıza atəş açmamaq barədə dərhal əmr verilib.
“Caliber” yazır ki, martın 21-i saat 15:00 radələrində “Patriot” UAZ-ı ilə erməni əsgəri axtarmaq üçün əraziyə yaxınlaşan Rusiya əsgərlərinə doğrudan da atəş açılıb, ancaq bu, erməni postunun yaxınlığında baş verib. Həmin müddətdə Azərbaycan Ordusuna Qaragöl istiqamətində atəş açmamaq barədə verilən əmr qüvvədə olub. Müvafiq məlumat Rusiya hərbi komandanlığının diqqətinə də çatdırılıb.
Ruslar isə öz hərbçilərinin güllə yarası almadığını deyiblər. Qeyd ediblər ki, güllə yalnız maşının şüşəsinə dəyib. Bunu Gorus administrasiyasının mətbuat xidməti də təsdiqləyib. Belə ki, iki rus əsgərin güllə yarası almadığı, lakin şüşə qırıntılarının onları yüngül zədələdiyi, tibb məntəqəsində baxışdan sonra dərhal hərbi xidmətə qayıtdıqları bildirilib.
Azərbaycan tərəfi ballistik ekspertizanın keçirilməsini tələb edib, çünki rus əsgərlərinin maşınına ermənilərin güllə atdığına əmindir.