Ətin bahalaşmasının səbəbi nədir? - Qəssablar narazılıq etdi

Son zamanlar ətin qiymətində yenidən artım müşahidə olunur.

Ətin bahalaşması qəssablar arasında narazılığa səbəb olub. Onlar diri heyvanın alış qiymətinin günü-gündən artmasından şikayətçidirlər.

“Adam var, bir ayda 300 manat maaş alır. Gəlir, 7 kilo ətə 150 manat pul verir. O pulla necə dolansın? Mən 30 ilə yaxındır qəssab işləyirəm, gələn alıcıya ətin qiymətini deməyə utanıram”, – qəssab söyləyib.

Qəssablar ətin bahalaşmasının səbəblərindən birinin də bütün rayonlarda diri heyvanların satışı bazarının hər gün təşkil olunması ilə əlaqələndirirlər. Halbuki əvvəlki illərdə heyvan bazarları həftədə yalnız bir gün təşkil olunurdu. Qəssablar bu ənənənin bərpa olunmasını istəyirlər.

İqtisadçılar isə bildiriblər ki, qiymət artımı bazarların hər gün təşkil olunması ilə bağlı deyil. Əksinə, bu amil rəqabəti çoxaldır və qiymətin düşməsinə səbəb ola bilər.

Qeyd olunub ki, heyvan bazarlarının hər gün təşkil olunması həm tez-tez baş verən xeyir və şər məclisləri, həm də restoranların sayının artması ilə bağlıdır. Odur ki, heyvan bazarının həftədə bir dəfə təşkil olunması bu tələbatı ödəmək üçün yetərli olmaya bilər.