Ev almaq, yoxsa tikdirmək sərfəlidir? - "Mənzil alanda bunu bilmirsən ki..." - Baku TV

Son illər yaşayış sahələrinin qiymətlərinin sürətlə artması ev sahibi olmaq üçün müxtəlif üsulları aktuallaşdırır.

Belə üsullardan biri də fərdi ev tikdirməkdir. Ancaq nəzərə almaq lazımdır ki, son illərdə bahalaşma torpaq sahələri və tikinti materiallarından da yan keçməyib.

Bəs istənilən halda mənzil almaq, yoxsa torpaq sahəsi alıb fərdi ev tikdirmək daha sərfəlidir?

Azərbaycan Qiymətləndiricilər Cəmiyyətinin sədri Vüqar Oruc ucuz torpaq sahələri tapıldığı təqdirdə, fərdi ev tikintisinin daha sərfəli olduğunu bildirir:

“Orta təmir, ilkin təmir, yaxşı təmir olmağından asılı olaraq, tikinti prosesinin hər kvadratmetri üçün təqribən 500-800 manat arasında xərc tələb olunur. Bunun üzərinə torpaq sahəsinə sərf olunan xərclər və abadlaşdırma işləri əlavə edildikdə, bir kvadratmetr təxminən 1000 manata başa gəlir. Mənzillər isə daha yüksək qiymətə təklif olunur. Şəhərdə orta qiymət təqribən 3500 manatdır. Ən yüksək qiymət isə Nəsimi rayonunda 17 min manata təklif olunur”.

Ekspert deyir ki, kiçikölçülü tikili üçün 2-3 sot, 100-150 kvadratmetrlik ev üçün 5-6 sot, daha böyük həcmdə fərdi ev tikintisi üçün isə 10-12 sot ərazi tələb olunur.

Torpaq sahələrinin qiymətləri isə əraziyə görə dəyişir. Elan saytlarına nəzər salanda məlum olur ki, Bakıətrafı ərazilərdə qiymət 1 sota görə 6 min manatdan başlayır. Bu qiymətə Saray qəsəbəsi, Fatmayi və Məmmədli kəndlərində çıxarışlı torpaq sahələri təklif olunur. Paytaxtın mərkəzinə yaxın ərazilərdə isə qiymətlər bir sota görə 55-60 min manatdan başlayır. Eyni qiymətə Əhmədli, Həzi Aslanov qəsəbəsindən də çıxarışlı torpaq sahələri almaq mümkündür.