Əvəz Zeynalov həqiqətən rüşvət alıb?

“Xural Yayınları”nın təsisçi və baş direktoru Əvəz Zeynalov və "Səda TV"də rəhbər vəzifədə işləyən Elnur Şükürovun təqsirləndirilməsinə dair cinayət işi üzrə ibtidai istintaq yekunlaşıb.

Bu barədə Baş Prokurorluğun Mətbuat Xidmətindən məlumat verilib. Bildirilib ki, qurumda aparılan istintaq zamanı Ə.Zeynalovun ayrı-ayrı şəxslərdən hədə-qorxu gəlməklə təkrar və külli miqdarda rüşvət alması müəyyən olunub. Habelə onun və E.Şükürovun qabaqcadan əlbir olaraq vəzifəli şəxslərin qərarına təsir etmək məqsədilə nüfuz alveri edərək pul almaları, xeyli miqdarda pulu dələduzluq yolu ilə ələ keçirmələri, eləcə də digər şəxsi rüşvət verməyə təhrik etmələrinə əsaslı şübhələr var.

Ə.Zeynalov və E.Şükürova Cinayət Məcəlləsinin bir neçə maddəsi ilə yekun ittiham elan edilib. İş baxılması üçün aidiyyəti üzrə Bakı Ağır Cinayətlər Məhkəməsinə göndərilib.