Gecəkorluğunun müalicəsində inqilabi kəşf | Alimlərdən möcüzəvi üsul

Polşalı alimlər insanın görməsində əsas rol oynayan RBP3 zülalının strukturunu təsvir ediblər.

Alimlər aşkar ediblər ki, bu zülal A vitaminini gözün torlu qişasına çatdırmaqla yanaşı, həm də şəraitdən asılı olaraq onun formasını dəyişir və bu da onu göz xəstəliklərinin müalicəsi üçün potensial hədəfə çevirir.

Alimlər RBP3-ü yüksək dəqiqliklə nəzərdən keçirmək üçün kiçikbucaqlı rentgen səpələnməsi də daxil olmaqla, qabaqcıl struktur analiz metodlarından istifadə ediblər.

Məlum olub ki, zülal hansı retinoidlə bağlanmasından asılı olaraq yığcamdan tutmuş uzanmış hala qədər müxtəlif formalar ala bilir. Bu plastiklik onun torlu qişa daxilində molekulların ötürülməsində dinamik rolunu göstərir.

Tədqiqatçıların sözlərinə görə, bu kəşf fotoreseptorların funksiyasının pozulduğu, proqressivləşən və sağalmaz xəstəlik olan piqmentli retinitin, yəni gecə korluğunun müalicəsində inqilab yarada bilər.

Alimlər həmçinin qeyd ediblər ki, RBP3 səviyyəsinin azalması korluğa gətirib çıxara biləcək daha bir yayılmış xəstəliyin ‒ diabetik retinopatiyanın proqressivləşməsi ilə bağlıdır. İlkin məlumatlara görə, bu zülalın fəaliyyətinin stabilləşməsi, torlu qişanın hüceyrələrinə qoruyucu təsir göstərir.