Girovunuz məhkəmə qərarı olmadan sizdən alına bilər

Borcunuzu ödəyə bilmirsinizsə, banka qoyduğunuz girov məhkəmə qərarı olmadan əlinizdən alına bilər.

Hüquqşünas Əkrəm Həsənov deyir ki, borc ödənilmədiyi halda kreditor notariusa müraciət edib icra qeydini alaraq onu icra məmuruna yönəltməklə prosesi reallaşdıra bilər.

Onun sözlərinə görə, banklar və kredit təşkilatları “İcra haqqında” Qanundan irəli gələn bu məsələdən sui-istifadə edirlər. Halbuki notariusun icra qeydi, təqdim olunan sənədlər borcun mübahisəsiz olduğunu təsdiq etdiyi halda aparılır.

Qanunvericiliyə görə, borcverən icra qeydinin aparılması üçün notariusa müraciət etdiyi gündən ən azı 20 gün əvvəl sifarişli poçt vasitəsilə borcluya tələbin icra edilmədiyi halda icra qeydinin aparılacağı barədə bildiriş göndərməlidir. Borclu bundan şikayət etmədikdə, borcverən notariusa müraciət edib icra qeydini alır və icra məmuru onun icrasını həyata keçirməyə başlayır. İcra qeydinin aparılacağı barədə bildiriş alan borclu isə qarşı tərəfdən məhkəmə qaydasında şikayət verə bilər.