Gördüyümlə gələn mal eyni deyildi | Xaricdən məhsul sifariş edərkən diqqətli olun!

Son zamanlar onlayn alış-veriş insanların istifadə etdiyi əsas metodlardan biridir.

Amma bu dəfə vətəndaşın sifarişinin nəticəsi gözlənilməz olub.

Belə ki, müştəri pulunu ödəyib və həvəslə məhsulun yolunu gözləyib. Qazan dəsti sifariş verdiyi halda ona qazan dəstinin şəkli göndərilib. Məsələ sosial şəbəkələrdə geniş müzakirələrə səbəb olub.

Bəs bütün bunlar nə dərəcədə realdır, diqqət etməli olduğumuz məqamlar nələrdir?

İT mütəxəssisi Fərid Pərdəşünasın sözlərinə görə, böyük şirkətlər, özünə hörmət edən satıcılar belə şeylər etmir, çünki bu, istehlakçı hüquqlarının tapdalanmasına gətirib çıxarır.

“Fotoda məhsuldan əlavə dekorasiyalar olur. Məsələn, şalvar satırlar, amma kostyum formasında qoyurlar. Təsvirinə baxanda görürsən ki, tək şalvardır. Sadəcə çinli satıcılar belə hörmətsiz yanaşırlar, müştərilərini bir növ manipulyasiya edirlər. Tələb edən zaman da deyilir ki, təsvirdə bu qeyd olunmuşdu, onu oxuyardın. Vətəndaşlara məhsulu seçən zaman mütləq təsviri oxumaları, həmin paketə nələrin daxil olub-olmadığını öyrənmələri tövsiyə olunur. Təkcə fotoya aldanıb məhsul sifariş etmək olmaz”, – deyə o bildirib.