Göz sağlamlığı üçün hansı qidalar yeyilməlidir? | Həkimlərdən tövsiyə

Qeyri-sağlam qidalanma və ekoloji amillər bütün orqanlara, o cümlədən gözlərin sağlamlığına mənfi təsir göstərir.

Aparılan son araşdırma zamanı göz sağlamlığı üçün hansı qidaların daha çox faydalı olduğu müəyyən edilib.

Mütəxəssislərin fikrincə, tərkibində lütein miqdarı çox olan bişmiş və çiy halda ispanaq, bişmiş halda kələm və çiy halda cəfərinin qəbul edilməsi gözlər üçün çox xeyirlidir.

Həkimlər gözlərin torlu qişasının normal fəaliyyəti üçün A vitamininin qəbulunu vacib sayır. Həmin vitaminin çatışmazlığı gözlərdə “toyuq korluğu” adlanan xəstəliyin inkişafına səbəb olur.

Gözdə yaranan problemlərin qarşısını alan vitaminlərdən biri də Omeqa-3 yağıdır. Omeqa-3 yağ turşusu görmə qabiliyyətini yaxşılaşdırır. Gözlərin arxasında yerləşən torlu qişa və hüceyrə membranını qoruyur.

S vitamininin çatışmazlığı isə gözlərin yorğunluğuna və qansızmalara səbəb olur. Bu baxımdan S vitamini ilə zəngin meyvə və tərəvəzlərin istehlakının gözə faydası çox böyükdür. Portağal və limon kimi qidalar göz əzələlərinin tonusunu tənzimləyir və damarları möhkəmləndirir.

Görmə qabiliyyətində problem olanlara tərkibi sinklə zəngin olan məhsulları – yerkökü, yaşıl tərəvəzi qida rasionuna əlavə etmək məsləhət görülür.