Guya ki, yağışdan qorunuruq... | Dayanacaqlar niyə yararsız haldadır?

Avtobus dayanacaqları ona görə qoyulur ki, sakinlər yağışlı və günəşli havada qorunsunlar.

Amma 8 Noyabr prospektində vəziyyət fərqlidir.

Belə ki, sözügedən ərazidəki dayanacağın damı yararsız vəziyyətdədir. Nəticədə yağışlı havada sərnişinlər dayanacaqda olduğu halda islanırlar.

“Girmişik ki, yağışdan qorunaq, başımıza yağır. Guya ki, yağışdan qorunuruq. Təzənin vəziyyəti belədirsə, köhnənin vəziyyətini özünüz təsəvvür edin”, – deyə paytaxt sakini narazılığını bildirib.

Məsələ ilə bağlı Azərbaycan Yerüstü Nəqliyyat Agentliyinin sözçüsü Tural Orucov bildirib ki, problemdən xəbərdardırlar.

Onun sözlərinə görə, həmin ərazidə dayanacaq sentyabr ayının 12-si quraşdırılıb. Amma dayanacağın damına zərblə yad cisimlərin atılması onu yararsız hala salıb. Tural Orucov yaxın zamanda zədələnmiş damın dəyişdiriləcəyini bildirib.