Hava şəraiti ilə bağlı əhaliyə təcili xəbərdarlıq | Hava haqqında məlumat

Aprelin 14-dən 15-nə keçən gecədən başlayaraq Bakıda və Abşeron yarımadasında hava şəraitinin fasilələrlə yağıntılı olacağı, şimşək çaxacağı, yağışın leysan xarakterli olacağı, arabir intensivləşəcəyi gözlənilir.

Bu barədə Milli Hidrometeorologiya Xidməti məlumat yayıb.

Bildirilib ki, aprelin 16-da yağıntıların aramsız güclü olacağı ehtimalı yüksəkdir. Prosesin şimşək və güclü küləklə müşahidə olunacağı gözlənilir.

Gözlənilən intensiv və güclü yağışla əlaqədar Abşeron yarımadasının bəzi ərazilərində subasma halları istisna olunmur. Prosesin aprelin 17-dək davam edəcəyi gözlənilir. Bölgələrdə də 14-dən 15-nə keçən gecədən başlayaraq ölkə ərazisindən soyuq atmosfer cəbhəsinin keçməsi ilə əlaqədar hava şəraitinin qeyri-sabit, yağıntılı keçəcəyi gözlənilir.

Aprelin 15-də bəzi yerlərdə yağıntıların intensivləşəcəyi, əsasən şimal və şərq rayonlarında güclü olacağı gözlənilir. 16-da isə prosesin daha da kəskinləşəcəyi, leysan yağışın aramsız, əksər rayonlarda isə intensiv və güclü olacağı ehtimalı yüksəkdir. Prosesin şimşəklə müşahidə olunacağı, dolu düşəcəyi, dağlıq ərazilərdə isə qar yağacağı ehtimalı var.

Aprelin 14-dən 15-nə keçən gecədən başlayaraq 17-dək gözlənilən proses ilə əlaqədar transsərhəd və ölkənin əksər yerli çaylarında yüksək sululuğun davam edəcəyi, əsasən dağ çaylarından sel və daşqın keçəcəyi gözlənilir.