“Heç müayinəni düzgün etməyiblər” | Hepatit C diaqnozu qoyulan qadının son halı

Baku TV bir müddət əvvəl Hepatit C xəstəsi olduğu üçün sığınacaqdan çıxarılan Güləbətin Zəkiyevanın həyat hekayəsini işıqlandırmışdı. Süjet efirə getdikdən sonra terapevt-hepatoloq Zaur Orucov həmin xanımı tam ödənişsiz müalicə etməyə hazır olduğunu bildirib.

“Müasir tibdə bu xəstəlik müalicə olunur və yoluxucu deyil. Analiz nəticəsində antitellərin çıxması hər zaman xəstəlik əlaməti sayılmır, sağlam insanda da bu nəticə ola bilər. Pasiyentə normal müayinə lazımdır, biz bu müayinəni həyata keçirməyə hazırıq”, – deyə həkim qeyd edib.

Təxminən 10 gün sonra analizlərin nəticəsi əldə olunub və Baku TV əməkdaşları Güləbətin Zəkiyevanın müalicəyə başlaması üçün onun qaldığı dayanacağa üz tutublar. Lakin bu dəfə onu orada tapmaq mümkün olmayıb.

Məsələ ilə bağlı Əmək və Əhalinin Sosial Müdafiəsi Nazirliyinin nəzdində fəaliyyət göstərən Sosial Xidmətlər Agentliyindən bildirilib ki, Güləbətin Zəkiyeva daimi yaşayış yeri üzrə qeydiyyatda olduğu Quba rayonuna yola salınıb, lakin vətəndaş yaxın qohumlarının yanında qaldıqdan sonra yenidən Bakıya qayıdıb:

“Əməkdaşlarımız tərəfindən Güləbətin Zəkiyeva müalicə alması üçün tibb müəssisəsinə yerləşdirilib. Hazırda o, Sahil qəsəbəsi, 3 saylı Birləşmiş Şəhər Xəstəxanasındadır”.

3 saylı Birləşmiş Şəhər Xəstəxanasından isə qeyd edilib ki, Güləbətin Zəkiyeva müalicə məqsədilə İmişli Rayon Mərkəzi Xəstəxanasına göndərilib.

Sözügedən tibb müəssisəsindən verilən məlumata görə, xəstə xroniki pankreatit diaqnozu ilə təxliyə edilib. Ona eyni zamanda II tip şəkərli diabet diaqnozu da qoyulub. Hazırda müalicəsi davam etdirilir, vəziyyəti isə qənaətbəxşdir.