Hərbi hazırlıq dərsində nələr öyrədilir? | "Vətəni qorumaq hər birimizin borcudur"

Yeniyetmələrin vətənpərvərlik ruhunda tərbiyə olunmasında hərbi hazırlıq fənninin rolu danılmazdır.

Vətənin keşiyində durmaq, onun hər qarış torpağını qorumaq üçün gənclər döyüş hazırlığının əsas prinsiplərinə dərindən yiyələnməlidirlər. Bu bilik və bacarıqların təməli isə məktəblərdə qoyulur.

Bəs orta məktəblərdə hərbi hazırlıq fənni necə tədris olunur? Bu dərsə maraq nə dərəcədədir?

“Baku TV” şəhid Nəriman Həmidovun adını daşıyan 208 nömrəli tam orta məktəbdə qonaq olub. Azərbaycanın qəhrəman oğlunun adını qürurla daşıyan bu məktəbin şagirdləri onun imza atdığı qəhrəmanlıq tarixini yaxşı bilirlər. Bunun bərabərində hərbi biliklərə də yiyələnmək Nəriman Həmidov kimi neçə-neçə vətən oğlunun keçdiyi şərəfli yola yenidən nəzər yetirməkdir.

Bu fənnə məktəbli qızlar da böyük maraq göstərirlər. Hər gün əldə etdikləri yeni bilik və bacarıqlar onların hərbi hazırlığa olan marağını daha da artırır.

“Tibbi yardım və fövqəladə hallarda davranış qaydaları kimi mövzuları öyrənmişik. Düşünürəm ki, bu fənni qızlar da bilməlidir. Vətəni qorumaq hər birimizin borcudur”, – deyə şagirdlərdən biri bildirib.