Hibrid maşınları ölkəmizdə necə populyarlıq qazandı? | Ekspert statistikanı açıqladı

Azərbaycana yalnız benzin və ya dizellə işləyən avtomobillərin idxalı azalıb.

Dövlət Gömrük Komitəsinin məlumatına görə, 2025-ci ilin yanvar-iyul aylarında ölkəyə 26 906 daxili yanma mühərrikli minik avtomobili idxal edilib ki, bu da 2024-cü ilin müvafiq dövrü ilə müqayisədə 6043 ədəd və ya 18,3 faiz azdır. 2024-cü ilin yanvar-iyul aylarında ölkəyə 32 949 bu cür nəqliyyat vasitəsi gətirilib.

Nəticədə əgər 2024-cü ilin ilk 7 ayında ölkəyə idxal edilən daxili yanma mühərrikli minik maşınlarının sayı ümumi minik avtomobili idxalının 71 faizinə bərabər idisə, 2025-ci ilin eyni dövründə bu göstərici 46 faizə enib.

Rəsmi məlumatlara görə, 2025-ci ilin yanvar-iyul aylarında ölkəyə gətirilən hibrid mühərrikli minik avtomobillərinin orta idxal qiyməti 20 070 dollar olub. Bu, hibrid avtomobillərin illik müqayisədə 30,6 faiz və ya 8859 dollar ucuzlaşması deməkdir. Hətta iyul ayı ərzində ölkəyə idxal edilən belə maşınların orta qiyməti 18 439 dollar təşkil edib.

Ənənəvi minik avtomobillərə gəldikdə isə bu dövrdə bir nəqliyyat vasitəsinin orta idxal qiyməti 19,1 faiz artıb. Nəticə etibarı ilə avtomobillərin ölkəyə idxalında ənənəvi olanların payının azalması fonunda hibrid avtomobillərin payı son bir ildə 24,5 faizdən 51,6 faizə yüksəlib.