Hüquq jurnallarının vahid elektron axtarış bazası yaradılacaq

Hüquq sahəsində nəşr olunan elmi jurnalların vahid elektron axtarış bazası yaradılacaq.

Hüquq və İnsan Haqları İnstitutu hüququn ayrı-ayrı sahələri, o cümlədən insan hüquq və azadlıqları sahəsində elmi-tədqiqat potensialının artırılması və hüquq nəşrlərinin bir bazada toplanılması məqsədilə dəyirmi masa təşkil edib.

İnstitutun İdarə Heyətinin sədri Məhəmməd Quluzadə bildirib ki, institut 109 hüquqşünas və 13 hüquq jurnalı arasında onlayn elektron sorğu keçirib və monitorinq hesabatı hazırlayıb.

Nəticədə bir çox hüquq jurnallarının elektron formatının mövcud olmaması, hüquqa dair məqalələrin keyfiyyətinin aşağı olması və beynəlxalq reytinqlərdə az təmsil olunmaları müəyyən edilib.

Bu problemin aradan qaldırılması üçün İnstitut BMT-nin İnsan Hüquqları üzrə Ali Komissarlığı ilə birlikdə hüquq jurnallarının vahid elektron axtarış bazasını yaratmağa dair razılıq əldə edib.

Vəkillər Kollegiyasının Akademiyasının rektoru Əmir Əliyev hüquq sahəsində məqalə dərc edən jurnallarla bağlı mövcud vəziyyətin qənaətbəxş olmadığını bildirib. O, hüquq jurnallarının nüfuzunu artırmaq üçün onların beynəlxalq data-bazada yer almasının vacibliyini deyib.

Qeyd edək ki, tədbirdə 20 hüquq jurnalının təsisçisi və redaksiya heyəti, hüquqşünas alimlər, eləcə də aidiyyəti dövlət qurumlarının əməkdaşları iştirak ediblər.

Müzakirələr zamanı elmi məqalələrin hazırlanmasında beynəlxalq təcrübənin tətbiq edilməsi, bu sahədə gənc hüquqşünaslara təlimlərin keçirilməsi, bəzi jurnalların sosial media hesablarının yaradılması, jurnallara göndərilən məqalələrin standartlara uyğunlaşdırılması təklifləri irəli sürülüb.