İlahiyyatçı və filosofun fikirləri toqquşdu | Onlar Allah haqqında nə deyə bilər ki?! - AMİN

“Amin” verilişinin yeni buraxılışı yayımlanıb.

Verilişin budəfəki sayında yazıçı, filosof Əlisa Nicat və ilahiyyatçı Elnur Əzimli ilə din və həqiqət mövzusu müzakirə olunub.

Həqiqətin mücərrəd məfhum olduğunu söyləyən Əlisa Nicat bildirib ki, bütün kainatın mahiyyəti onda ifadə olunub:

“Filosofların hamısı həqiqətə can atır. Amma hər bir insan həqiqətdən özünə uyğun olanı götürür. O, sonsuzdur”.

Ə.Nicat Allahla bağlı düşüncələrindən də bəhs edib: “Mənim üçün Allahın varlığı müəmmalıdır, həm var, həm yoxdur. Yüzlərlə filosof Allahın varlığına inanıb. Fiziklərdən, “Nobel” mükafatı alan alimlərdən Allah haqqında soruşmaq istəyərdim. Çünki mənə görə bu məsələ qeyri-müəyyəndir”.

İlahiyyatçı Elnur Əzimli yazıçının fikrinə münasibət bildirərkən qeyd edib ki, Əlisa Nicatın Allah haqqında tərəddüdləri başa düşüləndir. Çünki o bu məsələyə filosoflar çərçivəsindən baxır:

“Onlar ağıl yolu ilə mütləq həqiqətə çatmağa çalışırlar. Lakin ağıl mütləq həqiqətə çatacaq qüvvədə deyil. Çünki o, Allah tərəfindən verilən nemətdir və limitlidir. Onun gücünün çatmayacağı yerlər var. Əlisa müəllim “fiziklər, “Nobel” mükafatı alanlardan Allah haqqında soruşmaq istəyərdim” dedi. Lakin fiziklər görünən, təcrübə olunan şeyləri araşdırırlar. Ancaq Tanrı metafizikdir. Fizikanı yaradandır. Onların ixtisası Tanrını tapmaq yox, yaratdıqlarını araşdırmaqdır”.