İlham Əliyev bəzi sərəncam və fərmanlara dəyişiklik etdi

Müharibə əlilləri bu il dövlət icbari şəxsi sığorta vəsaiti hesabına mənzil və reabilitasiya vasitələri ilə təmin ediləcək.

Bu, Prezident İlham Əliyevin “Müharibə ilə əlaqədar əlilliyi müəyyən edilən şəxslərin və şəhid ailələrinin sosial müdafiəsi və sosial təminatı ilə bağlı tədbirlərin dövlət icbari şəxsi sığorta vəsaiti hesabına maliyyələşdirilməsi haqqında” sərəncama etdiyi dəyişiklikdə əksini tapıb.

Sərəncama əsasən, Əmək və Əhalinin Sosial Müdafiəsi Nazirliyi əlilliyi müəyyən edilən şəxslərin və şəhid ailələrinin sosial müdafiəsi və sosial təminatı ilə bağlı tədbirlərin maliyyələşdirilməsini əlavə olaraq 2022 və 2023-cü illərdə formalaşan dövlət icbari şəxsi sığorta vəsaiti hesabına həyata keçirəcək. Qeyd edək ki, indiyədək bu müddət təkcə ötən ili əhatə edirdi.

Ölkə başçısının digər müvafiq fərmanda etdiyi dəyişikliyə əsasən isə Dövlət Qulluqçularının Reyestrinin aparılması qaydası hazırlanacaq. Nazirlər Kabineti bu barədə təkliflərini iki ay müddətində hazırlayıb Prezidentə təqdim etməlidir.

Fərmanda edilən dəyişikliyə əsasən, həmçinin dövlət qulluqçusunun rotasiyası qaydası, rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına kompensasiya və birdəfəlik ödəniş verilməsi qaydası da hazırlanacaq. Nazirlər Kabineti bu barədə qaydanı üç ay müddətində ölkə başçısı ilə razılaşdırmaqla təsdiq etməlidir.

Sənədə əsasən, dövlət orqanlarının struktur qurumlarında onlara həvalə edilən funksiyalar nəzərə alınmaqla təminedici və yardımçı struktur bölmələrinin siyahısı da hazırlanacaq. Qanunda edilən dəyişiklikdə həmçinin yerli icra hakimiyyəti orqanlarının rəhbərlərinin müavinlərinin yeni təyinat qaydası müəyyənləşib. Bakı Şəhər İcra Hakimiyyəti başçısının müavinlərini Prezident təyin edəcək. Digər yerli icra hakimiyyəti orqanlarının rəhbərlərinin müavinləri isə müvafiq yerli icra hakimiyyətlərinin başçıları tərəfindən Prezident Administrasiyasının rəhbəri ilə razılaşdırılmaqla təyin olunacaq.