İlham Əliyev İnzibati Xətalar Məcəlləsinə dəyişiklikləri təsdiqlədi | Detallar açıqlandı

Dövlət reyestrinə daxil edilməyən dərman vasitələrinin reseptə yazılmasına görə vəzifəli şəxsləri 100 manatdan 150 manatadək, hüquqi şəxsləri 300 manatdan 400 manatadək cərimə gözləyir.

Bu, Prezident İlham Əliyevin təsdiqlədiyi İnzibati Xətalar Məcəlləsinə edilən əlavə dəyişiklikdə əksini tapıb.

Yeniliyə əsasən, dərman vasitəsinin Azərbaycan dilində olan istifadə təlimatı qablaşdırmanın içərisində və ya qablaşdırmanın yanında olmadıqda vəzifəli şəxslər 1500 manatdan 2000 manatadək, hüquqi şəxslər isə 5000 manatdan 7000 manatadək cərimələnəcək.

Aptekdəki dərmanlar və onların qiymətləri barədə istehlakçıya məlumat verməyən satıcılar isə 200 manatadək cərimə olunacaq.

İnzibati Xətalar Məcəlləsinə edilən əlavə dəyişikliklərdən biri də ödənişli avtomagistrallardan istifadə qaydalarının pozulmasına aiddir.

Qanuna əsasən, ödəniş məntəqələrindən keçmədən kənar yollardan istifadə edənlər ödənişli avtomagistrallara daxil olmağa və ya oradan çıxmağa görə 150 manat məbləğində cərimə ediləcək.

Buraxılış məntəqələrinin normal işinə mane olmağa, o cümlədən buraxılış məntəqələrində nəqliyyat vasitələrinin keçidini bağlamağa, gediş üçün maneəni özbaşına götürməyə görə isə 200 manat məbləğində cərimə tətbiq olunacaq.

İnzibati Xətalar Məcəlləsinə edilən daha bir dəyişiklik isə turizm və rekreasiya zonalarının ərazisində qadağan edilmiş fəaliyyətlə bağlıdır.

Qanuna əsasən, turizm və rekreasiya zonalarının ərazisində "Turizm haqqında" qanunla qadağan edilən fəaliyyətlə məşğul olmağa görə fiziki şəxslər 400 manatdan 600 manatadək, vəzifəli şəxslər 2000 manatdan 2500 manatadək, hüquqi şəxslər isə 3000 manatdan 4000 manatadək cərimə ediləcək.

Bundan əlavə, təhlükəli qida məhsullarını istehsal edənlər, satışını təşkil edənlər və ya satış məqsədilə saxlayanları isə 10 ilədək müddətə azadlıqdan məhrumetmə gözləyir. Bu isə Prezident İlham Əliyevin təsdiqlədiyi Cinayət Məcəlləsinə əlavə edilən yeni maddədə öz əksini tapıb.