İstirahətimiz üçün heç nə yoxdur | Yeni Günəşli sakinləri baxımsız qalan parkdan şikayətləndi

Bakının Suraxanı rayonu, Yeni Günəşli qəsəbəsində yerləşən “Ana-bala” adlanan park baxımsız vəziyyətdədir.

Ərazidə 2011-ci ildən təmir işlərinə başlanılsa da, 13 ildir rayonun ən böyük parklarından birində heç bir iş görülməyüb.

Sakinlər deyirlər ki, illər əvvəl onlara ərazidə “Günəşli istirahət mərkəzi”nin yaradılacağı barədə məlumat verilib. Layihəyə əsasən, istirahət mərkəzində fəvvarələr meydanı, uşaq bağçası, ahıllar bağı, skeyt stadionu tikilməli idi. Lakin həmin vaxt parka tikinti işləri üçün gətirilən materiallar elə qoyulduğu kimi də ortalıqda qalıb.

Vətəndaşlar asudə vaxtlarını keçirmək üçün Yeni Günəşlidə yerləşən yeganə parkın mövcud vəziyyətindən narazıdırlar.

“90-cı ildən burada yaşayıram. Parkda dəfələrlə təmir işlərinə başlayıb, dayanıblar. Deyirlər ki, guya pul qurtarıb, amma gələcəkdə təmirə davam ediləcəck. Hazırda Günəşlidə asudə vaxt keçirmək üçün bir yer yoxdur”, – sakin deyib.