Koronavirusun yeni ştammı dünyanı hərəkətə keçirdi

2023-cü ilin fevral ayında ilk dəfə aşkarlanmış koronavirusun "Omikron" ştamının yeni alt tipi EG.5 ÜST-ün diqqətini cəlb edən variant kimi dəyərləndirilib. Hazırda bu statusda olan daha iki variantdan XBB.1.5-in yayılma sayı azalmaqda, digəri isə XBB.1.16-nın səviyyəsi stabil qalmaqdadır.

Bunu Səhiyyə Nazirliyinin mütəxəssis-eksperti, infeksionist Təyyar Eyvazov deyib. O bildirib ki, dünya əhalisinin əksər hissəsinin peyvənd olunması və infeksiyanı keçirməsi nəticəsində yaranan immunitet bu və ya digər dərəcədə onları qoruyur.

"Virusun yeni ştamlarının əmələ gəlməsi onun mutasiyaları ilə əlaqədardır. Bu da təbii bir prosesdir və virusun təkamülünün bir mərhələsidir. Təcrübə göstərir ki, ən yeni ştam əvvəlkini yoluxdurma qabiliyyətinə və bununla bağlı yayılma sürətinə görə digərlərini üstələsə də, ağır xəstəlik törətmək qabiliyyəti xeyli zəifdir. Omikronun EG.5 variantı ilə bağlı narahatlıq son dövrdə bu ştama yoluxma hallarının sayındakı artımlarla bağlıdır.

Xəstəliyə yoluxma halları əsasən ABŞ, Avropada və Sakit Okeanın qərb hissəsində müşahidə olunur. ÜST rəsmiləri tərəfindən bu tendensiyanın davam edəcəyi, payızda pik həddinə çatacağı və onun dominant ştama çevriləcəyi proqnozlaşdırılır. Lakin xüsusi, daha sərt karantin tədbirlərinin tətbiqinə ehtiyac yoxdur”, – deyə infeksionist bildirib.

Təyyar Eyvazov onu da qeyd edib ki, Azərbaycanda bu məsələ Səhiyyə Nazirliyi və digər aidiyyəti dövlət qurumlarının daim diqqət mərkəzindədir. Onun sözlərinə görə, ölkəmizdəki mövcud testlər koronavirusu növündən asılı olmayaraq aşkarlamağa imkan verir. Operativ Qərargahın statistik məlumatlarına əsasən, hazırda epidemioloji vəziyyət stabil qalmaqdadır, infeksiyanın yayılma səviyyəsi çox aşağıdır.