Maşından yola zibil atanlar belə cərimələnəcək | Yol polisindən açıqlama

Binəqədi rayonu, Əhməd Rəcəbli küçəsini təmizləyən qadın gözlənilməz halla qarşılaşır. Yoldan keçən 90-GX-182 qeydiyyat nişanlı avtomobildəki şəxs əlindəki zibili onun qarşısına atır.

Sosial şəbəkələrdə yayılan bu görüntülər narazılıqla qarşılandı. İstifadəçilər bunun qeyri-etik hərəkət olduğunu deyərək həmin şəxsin cəzalandırılmasını istəyiblər.

Bakı Şəhər Dövlət Yol Polisi İdarəsindən bildirilib ki, qanunvericilikdə bu əmələ görə sürücülərin 40, sərnişinlərin isə 30 manat məbləğində cərimə edilməsi nəzərdə tutulur.

Qurumdan verilən məlumata görə, faktla bağlı araşdırma aparılıb və Həsənzadə soyadlı şəxs aşkar edilərək, törədilən qayda pozuntusuna görə inzibati protokol tərtib edilib.