Maşının üstünə çıxır, altına girir | Siçanların əlindən təngə gələn sakinlər - Baku TV

Nərimanov rayonu, Təbriz küçəsi, 94 ünvanında yaşayan sakinlər bildirirlər ki, bu ərazini siçanlar basıb.

Günün istənilən saatında burada siçanlara rast gəlmək mümkündür. Sakinlər bunun səbəbi olaraq ərazinin zibilliyə çevrilməsini göstərirlər.

Onlar qeyd edirlər ki, dəfələrlə bu ərazilər təmizlənməsinə baxmayaraq, siçanların qarşısını almaq mümkün olmayıb.

Sakinlərin sözlərinə görə, burada kütləvi şəkildə toplaşan siçanlar hətta onların avtomobillərinə də ziyan vurub.

"Siçanlar maşının üstünə çıxır, altına girir, burada yerimək olmur", – sakinlərdən biri deyib.

Məsələ ilə bağlı Nərimanov Rayon İcra Hakimiyyətindən bildirilib ki, ərazidə mütəmadi olaraq dərmanlama işləri aparılıb. Artıq bir neçə gün əvvəl də dezinfeksiya işlərinə başlanılıb və bu işlər Mənzil-Kommunal Təsərrüfatı Birliyinin əməkdaşları tərəfindən davamlı həyata keçiriləcək.