Məmurlara tələblər qoyuldu | Eldar Əzizov neqativ hallarla bağlı xəbərdarlıq etdi

Paytaxt rayonları, İcra Hakimiyyətləri başçıları və şəhərin təsərrüfat xidmətləri rəhbərlərinin iştirakı ilə növbəti müşavirə keçirilib. İcra başçılarına ciddi xəbərdarlıq edilib.

Bu barədə Bakı Şəhər İcra Hakimiyyətindən məlumat verilib.

Müşavirədə bir sıra məsələlər, o cümlədən paytaxtda aparılan əsaslı təmir, abadlıq-quruculuq, yaşıllaşdırma işlərinin vəziyyəti və digər məsələlər müzakirə olunub.

Paytaxtda aparılan əsaslı təmir, abadlıq-quruculuq işlərinin sürətləndirilməsi ilə bağlı müvafiq tapşırıqlar verilib. Qanunsuz tikililərlə bağlı məsələ ciddi müzakirə edilib və rayonlarda aparılan monitorinqlərin nəticələrinə dair görüntülər nümayiş olunub.

Bakı Şəhər İcra Hakimiyyətinin başçısı Eldar Əzizov bildirib ki, bu gün Prezident İlham Əliyev məmurlar qarşısında ciddi tələblər qoyub, təvazökar olmalarını bir vəzifə kimi tapşırıb.

Onun sözlərinə görə, hələ də neqativ hallar müşahidə edilir. Bununla əlaqədar Rayon İcra Hakimiyyətlərinin başçılarına ciddi xəbərdarlıq olunaraq təcili tədbirlərin görülməsi tapşırılıb.

Qurumun mətbuata yaydığı açıqlamada bildirilib ki, Bakı Şəhər İcra Hakimiyyətinin monitorinq qrupu tərəfindən işlərə nəzarət ediləcək və nəticələri bir aydan sonra yenidən müzakirəyə çıxarılacaq.