“Mənə evlilik təklifi etmədi” | Fenomenə çevrilən Eybətovlar ailəsindən səmimi etiraflar

“Arzunun vaxtı” verilişinin növbəti buraxılışında aparıcı və müəllif Arzu Kəlbi Nərmin Eybətova və Mübariz Eybətov cütlüyünün evində olub.

Proqramda cütlük tanışlıqlarından, münasibətlərinin necə formalaşmasından və bir-birlərinə verdikləri dəstəkdən söz açıblar.

Nərmin Eybətova həyat yoldaşı ilə tələbəlik illərində yollarının kəsişdiyini söyləyib:

“Biz universitet dövründə tanış olmuşuq. Əvvəl, sadəcə, dost idik. Zamanla aramızda sevgi yarandı. Mübariz məni olduğum kimi qəbul edən yeganə insandır. O, mənfi tərəflərimi belə müsbətə çevirməyi bacarıb”.

Bloger kimi fəaliyyət göstərən Nərmin sosial şəbəkələrdə üzləşdiyi xoşagəlməz rəylərə də toxunub:

“İzləyicilər xarici görünüşümlə bağlı “burnunu düzəltdir, qarnını ərit” kimi sözlər yazırlar. Amma mən özümü sevirəm və dəyişmək istəmirəm. Bəziləri səmimi insanlara qarşı aqressiya göstərirlər”.

Mübariz Eybətov isə xanımı ilə münasibətlərinin təməlində qarşılıqlı anlayışın dayandığını vurğulayıb:

“Nərmini tanıdıqca düşüncə tərzini, həyata baxışını bəyəndim. Biz, sadəcə, həyat yoldaşı yox, eyni zamanda dostuq. Problemləri böyütmürük, danışaraq həll edirik. Sevgimizin gücü bir-birimizə olan bağlılığımızdan qaynaqlanır”.