Məni daşqalaq edəcəklər, amma... | Ayaz Salayev din və incəsənətdən danışdı - AMİN

“Amin” verilişinin yeni buraxılışı yayımlanıb.

Verilişin budəfəki sayında rejissor, kinoşünas Ayaz Salayev ilə din və incəsənət mövzusu ətrafında müzakirə aparılıb.

Onun sözlərinə görə, din və incəsənət ən mürəkkəb mövzulardan biridir:

“Çünki incəsənət elə bir anlayışdır ki, o, çərçivələrə sığmır. Bu həm Qərb, həm də Şərq mədəniyyətinə aiddir. Dünya poeziyasında, ədəbiyyatında İslam mədəniyyətində olduğu kimi şərabı tərənnüm edən olmayıb”.

A.Salayev vurğulayıb ki, İslam ölkələrinin kinematoqrafiyasında ruhani mövzular azdır. Onların filmlərinin qəhrəmanlarını ancaq maddi problemlər maraqlandırır.

“Dahilik kimə nə vaxt və necə gəlirsə bilinmir. Məhz incəsənətə baxanda başa düşürük ki, Allah haqqında heç nə bilmirik. İncəsənət bizə bu sualların cavabını izah edir. Bəzən dahilər də canilər olub. Sənət insanları daha yaxşı etmir”, – deyə o qeyd edib.

Rejissor və kinoşünas verilişdə həmçinin müəllimlik fəaliyyətindən də bəhs edib.

“Bu sözümə görə bəlkə də məni daşqalaq edəcəklər. Məndən “Müəllimlərini daha çox görmək istəyərdin, yoxsa doğmalarını?” deyə soruşsalar, müəllimlərimi seçərdim. Onların həsrətini daha çox çəkirəm. Baxmayaraq ki, müəllimlərimin hamısı dünyasını dəyişib, amma ürəyimdə həmişə onlarla söhbət edirəm”, – deyə Ayaz Salayev əlavə edib.