Miras problemlərində əsas məsələ: hüquqşünasdan açıqlama

Təsəvvür edin, həyat yoldaşınız rəhmətə gedir. Əksəriyyətin zənn etdiyi kimi, mülk qarşı tərəfə keçmir. Mirasın bölüşdürülməsi zamanı problemlər yaranır. Ölənin valideynləri də pay sahibi olur. Onların razılığı olmadan mülk nə yoldaşının adına keçə bilər, nə də satıla bilər. Başqa sözlə, ər və ya arvad nikahdan sonra əldə etdikləri mülkü ölənin valideyni ilə bölməyə məcbur olur.

Məsələ ilə bağlı hüquqşünas Nurcan Abbasova bildirib ki, həyat yoldaşı vəfat etdikdə əvvəlcə əmlak yarıya bölünərək 50 faizi sağ olan həyat yoldaşına çatır:

“Yerdə qalan 50 faiz isə ölənin vərəsələri – həyat yoldaşı, uşaqları, valideynləri arasında bölünür. Vəfat edən şəxs ölmədən öncə vəsiyyətnamə tərtib edibsə, bu zaman əmlakı vəsiyyət elədiyi adama çatır. Lakin bu halda belə, ölənin həyat yoldaşı, uşaqları və valideynlərinin mirasdan məcburi payı var. Məsələn, ölən şəxs bütün əmlakını həyat yoldaşına vəsiyyət edirsə, bu zaman onun valideynlərinə və övladlarına da məcburi pay düşür. Məcburi pay isə vəsiyyətnamə olmasa, həmin şəxslərə çatacaq payın yarısını təşkil edir”.

Hüquqşünaslar deyirlər ki, Azərbaycanın bu sahədəki qanunvericiliyi Avropa ölkələri ilə eynidir. İslam ölkələrinə gəlincə isə mirasla bağlı qanunlar şəriətlə idarə olunur. Məsələn, oğullar qızlardan 2 dəfə çox miras ala bilərlər.