MN-dən təcili açıqlama | Bakıda görünən dronlar müzakirələrə səbəb oldu - Baku TV

Gecə saatlarında Bakıda dron uçması ilə bağlı məlumatlar yayılıb. Bu, sosial şəbəkələrdə istifadəçilər arasında müzakirələrə səbəb olub.

Yayılan videolara münasibət bildirən hərbi ekspert Şair Ramaldanov qeyd edib ki, Azərbaycanla həmsərhəd ölkələr – Rusiya, eləcə də İran müharibə şəraitindədir və əlbəttə ki, Azərbaycan cəmiyyəti də qonşu ölkələrdə bu proseslərin gedişi ilə bağlı istənilən təhlükə ola biləcək xəbərlərə həssasdır:

“Naxçıvanda baş verən son hadisədən sonra təbii olaraq bizim cəmiyyətdə də təşviş yaranıb. Bakı səmasında görünən hərəkətlilik, əlbəttə, dron məsələsidir”.

Hərbi ekspert həmçinin vurğulayıb ki, indi demək olar ki, müxtəlif təyinatlı məişətdə belə istifadə olunan dronlar var:

“Biz bilirik ki, müəyyən tədbirlərdə dronlardan videoçəkilişlər üçün də istifadə olunur. Bütün bunlara baxmayaraq, Azərbaycanın hava məkanı tam şəkildə qorunur və əgər hər hansı bir uçuş aparatı varsa, bunlar nəzarət altındadır”.

Məsələ ilə əlaqədar Müdafiə Nazirliyi rəsmi məlumat yaymasa da, nazirlikdən bildirilib ki, narahatlığa heç bir əsas yoxdur.