Müəllimlərə qızıl alan valideynlər danışdı

Görüntülər toy, nişan məclisini xatırlatsa da, Xırdalan şəhərində yerləşən 1 və 9 saylı tam orta məktəblərin ibtidai sinifləri üçün fərqli məkanlarda keçirilən tədbirlərdəndir.

Təntənəli şəkildə təşkil olunmuş müəllimlərə qızıl taxma mərasimi 1-ci və 4-cü sinifləri bitirən şagirdlərin valideynlərinin ideyasıdır. 1 saylı məktəbin 4-cü sinfini başa vuran şagirdlərin valideynləri tərəfindən alınan qiymətli əşyaların görüntülərinin sosial şəbəkələrdə yayılması geniş müzakirələrə və tənqidlərə səbəb olub. Amma valideynlər özlərini haqlı hesab edirlər.

Baku TV-nin əməkdaşı məsələ ilə bağlı görüntülərin “qəhrəman”ı, 1 saylı məktəbin ibtidai sinif müəllimi Yaqut Ağamalıyevadan münasibət öyrənməyə çalışıb. Amma o, məktəbdə olsa da, açıqlama vermək istəməyib.

9 saylı tam orta məktəbin müəllimi Cəlalə Abdullayevanı hədiyyə yağışına qərq edən valideynlər isə bunun normal hal olduğunu deyiblər.

Məsələ ilə bağlı Abşeron-Xızı Regional Təhsil İdarəsindən bildirilib ki, görüntüləri yayılan hər iki məktəbin müəllimləri ilə bağlı araşdırma aparılır.