Naxçıvanda yenilik | məktəblərdə yardımçı vəzifələrə imtahanlar keçirildi

“İşə qəbul qaydaları çərçivəsində Naxçıvan Muxtar Respublikasında tədris-yardımçı heyətin işə qəbulu üzrə test imtahanı keçirildi. İki imtahan mərkəzində 126 vakant yer uğrunda 600-dən artıq namizəd öz biliyini yoxladı. İmtahan prosesinin şəffaf, hər kəs üçün eyni, bərabərhüquqlu təşkil olunduğunu müxtəlif dövlət qurumlarının ziyalıları, ictimaiyyət nümayəndələri müşahidə etdilər”.

Bunu Naxçıvan Muxtar Respublikası təhsil naziri vəzifəsini icra edən nazir müavini Elxan Nəcəfov jurnalistlərə açıqlamasında deyib.

“İşə qəbul qaydaları çərçivəsində gələcəkdə direktor, direktor müavinlərinin, ümumilikdə isə ölkə üzrə müəyyənləşmiş qaydada müəllimlərin işə qəbul prosesini təşkil edəcəyik.

Məqsəd Naxçıvan Muxtar Respublikasında aparılan islahatlar kontekstində təhsilin idarə olunması, eyni zamanda işə qəbul qaydalarında ədalətli və qanunvericilik normativlərini əsas tutaraq bu prosesi təşkil etməkdir”, – o vurğulayıb.