Niyə evlənənlər azalıb, ölənlər çoxalıb? - "O adamlar daha çox boşanır ki..." - Baku TV

Yanvar ayında nikahların və boşanmaların sayı azalıb.

Bu barədə Dövlət Statistika Komitəsinin yaydığı məlumatda bildirilir.

Belə ki, Ədliyyə Nazirliyinin rayon qeydiyyat şöbələrində 2026-cı ilin ilk ayında 2922 nikaha daxilolma və 1779 boşanma halı qeydə alınıb. 2025-ci ilin müvafiq dövrü ilə müqayisədə əhalinin hər 1000 nəfərinə nikahların sayı azalaraq 5,4-dən 3,4-ə, boşanmaların sayı isə 2,1-dən 2-yə düşüb.

Sosioloq Lalə Mehralı bildirib ki, gənclərin ailə qurmaqdan çəkinməsinin müxtəlif sosial-iqtisadi səbəbləri var:

“Paytaxtda yaşayan gənclər üçün əsas maneə mənzil problemidir. Gənc qızlar çox vaxt evi olmayan oğlanlara şans vermirlər. Bölgələrdə isə mənzil və torpaq məsələsi o qədər kəskin olmasa da, işsizlik və gəlir səviyyəsinin aşağı olması əsas problemdir”.

Ekspertin fikrincə, dövlət tərəfindən yeni evlənən gənclərə dəstək məqsədilə kiçik faizli kreditlər və sosial evlər layihəsi kimi xüsusi proqramlar tətbiq edilə bilər.

Bundan əlavə, 2026-cı ilin yanvar ayı ərzində ölkədə 6243 ölüm halı qeydə alınıb. Bu da 2025-ci ilin müvafiq dövrü ilə müqayisədə əhalinin hər 1000 nəfərinə 6,6-dan 7,2-yə qədər artım deməkdir. Beləliklə, rəsmi statistika göstərir ki, ilin ilk ayında həm nikahların, həm də boşanmaların sayında azalma müşahidə olunsa da, ölüm hallarının artması demoqrafik mənzərədə diqqətçəkən əsas məqamlardan biri kimi önə çıxır.

Mütəxəssislər isə hesab edirlər ki, bu tendensiyalar, sosial-iqtisadi amillər ailə institutuna yanaşma və ümumi həyat şəraiti ilə birbaşa bağlıdır.