Od qiymətinə olan süni uşaq qidaları niyə ölkəmizdə istehsal edilmir?

Azərbaycanda satılan süni uşaq qidalarının qiymətləri ilbəil artır. Bu məhsulların ölkədə istehsal olunmaması valideynləri daha da çətin vəziyyətə salır.

Azad İstehlakçılar Birliyinin sədri Eyyub Hüseynovun sözlərinə görə, uşaq qidalarının hazırlanmasında gigiyena və digər bir sıra tələblərə əməl olunmalıdır. Buna görə də yerli istehsalçılar belə riskli məhsulu istehsal etməkdən çəkinirlər.

İqtisadçı Xalid Kərimli deyir ki, bu qidaların ölkəmizdə istehsalı onun daha keyfiyyətli və ucuz olacağı mənasına gəlmir.

“Ölkə daxilində uşaq qidalarının satış bazarı böyük olmadığına görə sahibkarlar yüksək investisiyalar qoyaraq bu qidaları istehsal etmək haqqında düşünmürlər”, ‒ iqtisadçı qeyd edib.

Azərbaycan Süd və Süd Məhsulları İstehsalçıları və İxracatçıları Assosiasiyasının sədri Samir Eyyubov isə yerli istehsalın hazırda real görünmədiyini bildirir.

Belə ki, o, uşaq qidalarını istehsal edəcək qədər süd ehtiyatlarımızın olmadığını düşünür.

Qeyd edək ki, Azərbaycan Respublikasının Dövlət Gömrük Komitəsinin məlumatına görə, təkcə 2024-cü ilin yanvar ayında 252 ton süni uşaq qidası idxal olunub. Bu rəqəm 2025-ci ilin müvafiq ayı ilə müqayisədə 230 tona düşüb. Lakin 2024-cü ilin yanvarında 2 milyon 207 min dollar idxal dəyəri 2025-ci ilin müvafiq dövründə 2 milyon 651 min ABŞ dollarına yüksəlib. Bu da bir ay ərzində məhsulun təxminən 20 faiz bahalaşdığını göstərir.