Ödənişli yolda ödəmə məntəqələri və qiymətlər müəyyənləşdi

Avtomobil Yolları Dövlət Agentliyi Bakı-Quba-Rusiya Federasiyası ilə dövlət sərhədi avtomobil yolunun ödənişli hissəsinin gediş tariflərini açıqlayıb.

Bu yolla hərəkət edən sürücülər daxil olduğu ödəniş məntəqələrindən başlayaraq qət edəcəkləri məsafəyə uyğun pul ödəməlidirlər.

Yoldan istifadəyə görə ən az ödəniş başlanğıc nöqtədən – Yeni Yaşma məntəqəsindən Giləzi məntəqəsinədək, yəni mövcud magistral yolun 75-ci kilometrinə qədər olan məsafəyə qədərdir.

Avtobuslara aid olan tariflə bunun üçün 1 manat 79 qəpik ödəmək lazım gələcək. Ən çox ödəniş isə TIR-lar üçün nəzərdə tutulub. Bu nəqliyyat vasitələri yoldan tam məsafədə istifadə üçün 25 manat ödəməlidir. Minik avtomobilləri üçün qiymət isə 2 manat 14 qəpikdən 12 manatadək dəyişir.