Özbaşına tikilən evlər sənədləşdirilməyəcək? | Ekspertlər münasibət bildirdi - Baku TV

Azərbaycanda özbaşına tikilən evlərin sənədləşdirilməsi məsələsi aktual olaraq qalır. Qeyri-rəsmi məlumatlara görə, ölkədə 400-500 min belə tikili mövcuddur.

Daşınmaz Əmlakın Dövlət Kadastrı və Reyestri publik hüquqi şəxsin İdarə Heyətinin sədri Nigar Alimova hesab edir ki, özbaşına tikilən evlərin sənədləşdirilməsi qanunsuz tikinti prosesinin tam dayandırılmasından sonra mümkündür:

“İstənilən növ amnistiya təşviq xarakterli olmalı deyil. Vətəndaşlar dərk etməlidirlər ki, qanunsuz tikili aparmaq olmaz. Biz bu prosesin dayandığını görməliyik. Bu məlumat vətəndaşlara ötürüldükdən sonra düşünürəm ki, həmin tikililərin də amnistiyası məsələsinə baxılacaq”.

Daşınmaz əmlak eksperti Ramil Osmanlı isə məsələnin bu cür həllinin doğru olmadığını bildirib:

“Əslində, bir qərarla bu iki prosesi eyni vaxtda icra etmək mümkündür. Yəni amnistiya elan olunsun, mövcud özbaşına tikililər sənədləşdirilsin və həmin qərarın tərkibində ayrıca bir bəndlə bütün aidiyyəti qurumlara gələcəkdə özbaşına tikililərin qarşısının alınması üçün ciddi tədbirlər görülməsi istiqamətində tapşırıq verilsin. Bu cür hallar aşkar edildikdə isə həm vəzifəli, həm də fiziki şəxslər inzibati və cinayət məsuliyyətinə cəlb olunsun”.

Qeyd edək ki, son bir neçə ildə ölkədə qanunsuz tikililərlə bağlı qanunvericiliyə dəyişiklik edilməsinə başlanılıb. Belə dəyişikliklərdən biri mülkiyyət sənədi olmayan torpaq sahələrində olan tikililərin kommunal xidmətlərlə təmininin qadağan olunmasıdır.