Prorektorun qətli ilə bağlı yeni detallar ortaya çıxdı

“Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən sözügedən universitetin sabiq rektoru Müşviq Atakişiyev, Dəyanət Quliyev və Samir Quliyevin cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə şahidlər ifadə verib.

Zərərçəkmiş Tariyel Əhmədovun kürəkəni Babək Aslanov ifadəsi zamanı qayınatasının qətlə yetirildiyi ilk gündən Müşviq Atakişiyevdən şübhələndiyini qeyd edərək buna görə hətta hüzr mərasimində sabiq rektorla mübahisə edərək onu məclisdən qovduğunu deyib.

Babək Aslanov bildirib ki, hadisə baş verən ərəfələrdə prorektorun qətlinə görə mətbuatda onun üzərində şübhələrin olması ilə bağlı məlumatların tirajlanması da Müşviq Atakişiyevin əməli idi.

Digər əsas məqam isə dayısının göstərişi ilə prorektorun qətlini sifariş edən keçmiş polis Dəyanət Quliyevin törətdiyi hadisə ilə bağlı bir neçə il əvvəl sərxoş vəziyyətdə qızı Fəridə Quliyevaya danışmasıdır.

Bütün bunlar Dəyanətin qardaşı Xalid Quliyevin ibtidai istintaqa verdiyi ifadə zamanı ortaya çıxıb.