Püstənin sürətlə azalmasına səbəb Dubay şokaladıdır?

Dubay şokoladı ətrafında ajiotaj dünyada püstə qıtlığına yol açıb. Bu səbəbdən püstə ləpələrinin qiyməti 7,65 dollardan 10,30 dollara qədər artıb.

Sahibkarların bildirdiyinə görə, Azərbaycanda istehsal olunan məhsulların qiymətində hələlik artım müşahidə olunmur. Əksinə, yay aylarına doğru qiymətlərin aşağı düşəcəyi proqnozlaşdırılır.

“Amerikadan gələn malların qiymətində baş verən artım bizdən asılı deyil. Amma yerli məhsulların qiymətində heç bir dəyişiklik yoxdur”, – deyə sahibkarlar vurğulayıblar.

İqtisadçı Xalid Kərimli isə bildirib ki, püstəyə olan tələbat hazırda da artmaqda davam edir və bu, qiymətlərin yenidən bahalaşmasına səbəb ola bilər.

“Buna səbəb reklamın yaratdığı ciddi tələbat artımıdır”, – deyə iqtisadçı qeyd edib.

Qeyd edək ki, qiyməti kifayət qədər yüksək olan qabıqlı püstə ölkəyə 2023-cü ildə 229,41, 2024-cü ildə 277,97 ton gətirilib. Qabığı təmizlənmiş püstə idxalı isə 2023-cü ildə 27,39 ton olduğu halda bu rəqəm 2024-cü ildə 58,38 tona qədər artıb.