Qarabağ erməniləri Azərbaycan vətəndaşı olmaq istəyir

Qarabağda yaşayan erməni sakinlər üçün yaradılmış "Qaynar xətt"ə 100-ə yaxın müraciət daxil olub.

Bunu Baku TV-yə açıqlamasında Dilarə Əliyeva adına Qadın Hüquqlarını Müdafiə Cəmiyyəti nəzdində fəaliyyət göstərən "Qadın: Sülh və Təhlükəsizlik Mərkəzi"nin rəhbəri Dilarə Əfəndiyeva deyib.

Onun sözlərinə görə, bir çox ermənilər Azərbaycan vətəndaşlığını qəbul etmək istədiklərini dilə gətiriblər:

“Qarabağda yaşayan ermənilər zəng edərək onların Azərbaycan cəmiyyətinə inteqrasiyasının nə dərəcədə mümkün olması ilə bağlı suallar verirlər. Hüquqlarının təmin olunub-olunmayacağı onları maraqlandırır. Eləcə də Azərbaycan vətəndaşlığına keçmək üçün çoxsaylı müraciətlər daxil olur. Onlar bu yolun hüquqi tərəfləri ilə maraqlanırlar. Hazırda Rusiya sülhməramlılarının müvəqqəti yerləşdiyi ərazilərimizdə yaşayan ermənilər Azərbaycan ilə birləşməyə müsbət baxdıqlarını bildiriblər. Ən maraqlısı isə odur ki, yaxın günlərdə bir Ermənistan vətəndaşı sevinc hissi ilə mənə zəng edərək övladının dünyaya gəldiyini bildirdi. Bu isə o deməkdir ki, insanlar artıq bizi özlərinə yaxın hiss edirlər və sevinclərini bizimlə bölüşürlər”.

Qeyd edək ki, 2022-ci il dekabrın 16-da Azərbaycanda Qarabağ erməniləri üçün “Qaynar xətt” yaradılıb. Qarabağ bölgəsindən “Qaynar xətt”ə müraciət edənlərin məxfiliyinə tam zəmanət verilir.