Quşçuluq massivinin keçilməz yolları | Məsələ niyə həllini tapmır? - Baku TV

Hövsan qəsəbəsinin Quşçuluq massivində yolların asfalt örtüyü yoxdur. Çuxurlarla dolu yollar sakinlərin və nəqliyyat vasitələrinin hərəkətində ciddi çətinlik yaradır.

Sakinlər bununla bağlı narazılıqlarını Baku TV ilə bölüşüblər.

“Aidiyyəti qurumlardan bir şey istəyirik: yol çəkməyə gəlsinlər”, – onlardan biri söyləyib.

Digər bir vətəndaş isə qeyd edib: “Uşaqlar məktəbə gedə bilmirlər. Bura nə taksi, nə də təcili tibbi yardım maşını gəlir. Dərdimizi kimə deyəcəyimizi bilmirik”.

Məsələ ilə bağlı Suraxanı Rayon İcra Hakimiyyətindən bildirilib ki, rayon ərazisində asfaltlanmaya ehtiyacı olan küçələrin təmir olunması ilə bağlı vətəndaşların müraciəti əsasında aidiyyəti üzrə Avtomobil Yolları Dövlət Agentliyinə müvafiq məktublar ünvanlanıb.

Avtomobil Yolları Dövlət Agentliyindən isə qeyd olunub ki, qəsəbədaxili küçə yollar qurumun balansında deyil və Agentlik tərəfindən həmin ərazilərdə İnvestisiya Proqramından kənar hər hansı bir təmir işləri icra olunmur:

“Ümumiyyətlə, Agentlik hər hansı bir ərazidə təmir işlərinin aparılmasında qərar verici səlahiyyətə malik deyil. Yerli icra strukturları tərəfindən aidiyyəti üzrə təkliflər hazırlanaraq təqdim olunmalıdır. Sözügedən təkliflər əsasında ərazilər İnvestisiya Proqramına daxil edilərsə, artıq həmin yerlərdə təmir işlərinin aparılması Agentliyə həvalə oluna bilər”.