Qaraciyərin zədələnməsi nələrə səbəb ola bilər? | Xəstəliyin ilkin əlamətləri açıqlandı

Qaraciyərin 100-dən çox müxtəlif xəstəliyi var.

Bu xəstəliklər infeksiyalar, alkoqolun həddindən artıq qəbulu, dərman istifadəsi, toksinlər, narkotik maddələr, onkoloji problemlər və piylənmə kimi səbəblərdən qaynaqlana bilər.

Kəskin qaraciyər zədələnməsi qəfil baş verir və sürətlə irəliləyir. Xroniki qaraciyər xəstəlikləri isə yavaş inkişaf edir və ilkin mərhələdə simptomlar özünü büruzə vermir.

İlk əlamətlər arasında iştahsızlıq, yorğunluq var. Dəri və gözlərin ağ qişası sarı rəng alır, çünki qaraciyər bilirubini kifayət qədər çıxara bilmir. Xroniki qaraciyər xəstəlikləri zamanı dərinin güclü qaşınması müşahidə olunur.

Qaraciyərin zədələnməsi qan dövranının pozulmasına gətirib çıxarır. Belə olan təqdirdə qarında həddindən artıq maye yığılır və qarın görünüşcə şişmiş olur. Ayaq və topuq nahiyəsində də şişkinlik müşahidə edilir. Ağarmış nəcis və tünd rəngli sidik də əlamətlər arasındadır.

Ürəkbulanma, qusma, tez-tez göyərmə, qanaxmalar, dəridə damar ulduzcuqları varsa, həkimə müraciət edilməlidir.