Qədim şəhərin modul tipli məktəbi | "Məktəbimizdən çox razıyıq" - Baku TV

Baku TV Kəlbəcərdə Bəhmən Cəfərov adına bir nömrəli tam orta məktəbdən reportaj hazırlayıb.

Sözügedən təhsil müəssisəsi 2025-ci ilin sentyabr ayından fəaliyyət göstərir. Hazırda məktəbdə 100-ə yaxın şagird təhsil alır. Təhsil ocağı modul tiplidir, 2026-cı ilin sentyabr ayında isə ərazidə yeni məktəb binasının istifadəyə verilməsi nəzərdə tutulur.

Bəhmən Cəfərov adına bir nömrəli tam orta məktəbdə müəllim kimi fəaliyyət göstərən Kəmalə Hacıyeva doğma yurda qayıtması ilə bağlı təəssüratlarını Baku TV ilə bölüşüb:

“Kəlbəcərdən gənc qız kimi çıxmışdım, bu gün isə müəllim olaraq Vətənə qayıdıb fənnimi tədris edirəm. Uşaqlar da çox yaxşıdır. İlk vaxtlar alışmaqda çətinlik çəksələr də, adaptasiya prosesləri qısa zamanda başa çatdı”.

Məktəbin şagirdi Sara Nəcəfzadə də Kəlbəcərə qayıtdığı üçün xoşbəxt olduğunu söyləyib:

“Dərslər, həqiqətən, çox yaxşı keçir. Müəllimlərimiz bizi daim motivasiya edir, hər hansı problemimiz olduqda onun həlli üçün əllərindən gələni edirlər”.