Quba şəhərində WUF13 Festivalı keçirilib - Baku TV

Aprelin 30-da ölkə ictimaiyyətinin Ümumdünya Şəhərsalma Forumunun 13-cü Sessiyası (WUF13) haqqında məlumatlandırılması məqsədilə Quba şəhərində festivala start verilib.

Günün birinci yarısında Azərbaycan Dövlət Pedaqoji Universitetinin Quba filialında WUF13 ilə bağlı məlumatlandırma sessiyası təşkil edilib.

Sessiyada universitetin müəllim və tələbə heyəti, Quba şəhərində yerləşən müxtəlif məktəblərin və liseylərin şagirdləri, eləcə də Özbəkistandan Azərbaycan Dövlət Pedaqoji Universitetinə gələn müəllimlərdən ibarət qonaqlar iştirak ediblər.

Tədbirdə çıxış edənlər Forum barədə ətraflı məlumat veriblər. Çıxışlarda Forumun ölkəmiz üçün əhəmiyyəti və onun çərçivəsində müzakirə olunacaq əsas mövzular diqqətə çatdırılıb.

Festival axşam saatlarında açıq havada ictimai proqramlarla davam edib. Proqram çərçivəsində interaktiv fəaliyyətlər, maarifləndirici oyunlar, təqdimatlar və ictimai müzakirələr vasitəsilə dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular geniş auditoriyaya çatdırılıb. Eyni zamanda Forumun əsas mövzusu və ideyaları barədə ətraflı məlumat təqdim olunub.