"Bu sular evlərə dolur, müraciət etsək də..." | Sakinlərin başına iş açan problem - Baku TV

Biləsuvarın Xırmandalı kənd sakinləri çətinliklə üz-üzə qalıblar. Söhbət kəndin təxminən 15 il əvvəl salınmış yeni yaşayış massivindən gedir.

“Baku TV”nin qaynar xəttinə müraciət edən sakinlər bildirirlər ki, illərdir yağış və qrunt suları küçələrə, oradan isə həyətlərə və evlərə dolur. Ərazidə yağış sularının axıdılması üçün drenaj sistemi yoxdur.

Şikayətçilər deyirlər ki, yaxınlıqdan ana kanal keçir, lakin həmin kanala qoşulma üçün heç bir infrastruktur qurulmayıb.

“Artıq 15 ildir burada yaşayıram. Çəkilən yol da, görülən işlər də əhalinin öz şəxsi hesabına görülüb. Yağış yağanda təcili yardım belə bu küçəyə gəlmir, çünki maşınlar yolda ilişib qalır”, – kənd sakini söyləyib.

Bələdiyyə nümayəndəsi isə məsələyə belə münasibət bildirib: “Vətəndaş özü etməlidir, mən onun kanalını qazası deyiləm ki. Əvvəl kanal çəkilməlidir ki, sonra yol düzəldilsin. Vətəndaş təmizləməsə, biz texnika sala bilmirik. Ərazi dardır, texnika girə bilmir. Kanal qazılmasa, bu problem ömür boyu həll olunmayacaq”.

Təxminən 500 sakinin yaşadığı yaşayış massivinin problemi ilə bağlı Biləsuvar Rayon İcra Hakimiyyətindən isə bildirilir ki, ərazi bələdiyyənin balansındadır. Sadəcə yol dar olduğu üçün bələdiyyə orada texnika işlədə bilmir.