"Gecələr çox olur, anidən çıxır..." | Ödənişli yol niyə ölüm saçır? - Baku TV

Bakı-Quba-Rusiya sərhədi istiqamətində ödənişli avtomobil yolundan istifadə edən sürücülər son vaxtlar təhlükəli vəziyyətlərlə üzləşdiklərini bildirirlər.

Buna səbəb yolun hərəkət hissəsində tez-tez ev və çöl heyvanlarının görünməsidir. Belə hallara daha çox yolun Xaçmaz və Şabran rayonlarından keçən hissələrində rast gəlinir.

Sürücülərin sözlərinə görə, qəfil yolun hərəkət hissəsinə çıxan heyvanlar ciddi təhlükə yaradır və qəzalara səbəb ola bilər. Heyvanların yola çıxmasının əsas səbəblərindən biri isə yolun kənarlarına çəkilmiş dəmir torların bəzi şəxslər tərəfindən kəsilərək açılmasıdır.

“Eşitmişəm ki, Qusar rayonundan bir ailə – ər-arvad gəlirdi, hadisə də həmin yerdə baş verib, elə oradaca keçiniblər. O torları çəkiblər ki, heç bir heyvan keçməsin. Amma mən üç yerdə görmüşəm ki, torları kəsib açıblar. Birdən qarşınıza heyvan çıxsa, heç kim avtomobili saxlaya bilməz”, – sürücülərdən biri bildirib.

Digər sürücü isə xüsusilə gecə saatlarında vəziyyətin daha təhlükəli olduğunu deyib:

“Gecələr qəza riski daha çox olur. Ətrafda o qədər çaqqal və digər vəhşi heyvanlar var ki, aclıqdan yola, kəndlərə gəlirlər. Bu zaman da qəzalar və digər hadisələr baş verə bilir”.