"Gizlicə telefon aldım ki..." - İnternata verilən əlil cütlüyün başına nələr gəlib? | ARZUNUN VAXTI

“Arzunun vaxtı” verilişinin budəfəki qəhrəmanları internatda böyüyən və ailə quran cütlük – Zəhra İsmayılova və Fazil İsmayılov olub.

Onlar həyat hekayələrindən və keçdikləri çətin yoldan bəhs ediblər.

Zəhra İsmayılova uşaqlıq illərindən danışaraq valideynsiz böyüməyin ağırlığını belə ifadə edib:

“Atam rəhmətə gedəndən sonra anam imkansızlıq ucbatından bizi internata qoydu. Əvvəllər anamı qınayırdım ki, niyə belə edib. Sonra Pirallahıda anamın rəfiqəsi ilə danışandan sonra anladım ki, anamın günahı yoxdur”.

Ayrı-ayrı uşaq evlərində böyüyən cütlük tanışlıq hekayələrini də bölüşüblər.

“Telefonu gizlin almışdım, çünki bizə istifadə etməyə icazə vermirdilər. Gizlincə işlədib sonra DVD-nin içinə qoyurdum. Elə bu şəkildə bir-birimizi tapdıq və tanış olduq”, – deyə Zəhra qeyd edib.

Fazil İsmayılov isə onların münasibətinin necə başladığını belə xatırlayıb:

“Zəhranı ilk dəfə Bilgəhdə görmüşdüm. Sonra illər keçdi, Buzovnada olduğunu bildim. Onunla ilk dəfə danışanda dedim ki, bu gün həm tanışlığımız, həm də gələcək evliliyimizin başlanğıcı olacaq. 2024-cü ildə danışmağa başladıq, 2025-ci ildə isə ailə qurduq”.