"İndikilər qəzet oxumurlar, amma..." - Mətbuatda hansı çatışmazlıqlar var?

Azərbaycan Jurnalistlər Birliyinin sədri Elçin Şıxlı Milli Mətbuat Günü ilə bağlı çıxışında Azərbaycan mediasının keçdiyi mərhələlərə, bu sahədəki problemlərə və gələcək üçün arzulanan mənzərəyə toxunub.

Onun sözlərinə görə, 1992-ci ildə latın qrafikasına keçidlə bağlı qərar verilsə də, bu keçid həm dövri mətbuatda, həm də ədəbiyyatda çətinliklə həyata keçib:

“1992-ci ildə latın əlifbasına keçidlə bağlı qanun imzalandı, lakin qəzetlər, dövri mətbuat və ümumiyyətlə ədəbiyyat bu keçidə tam hazır deyildi. Gənclərin bir çoxunun qəzet oxuma formalaşmadı, çünki onlar kiril əlifbasını bilmirdilər. 2001-ci ildən dövri nəşriyyatlar tam şəkildə latın qrafikasına keçdi, amma bu, artıq bir çox vərdişlərin itməsi ilə nəticələndi”.

O bildirir ki, müasir platformalar informasiya baxımından çevik olsa da, dərinlik və təhlil baxımından ciddi boşluqlar mövcuddur:

“Sosial şəbəkələrdə bir-iki cümləlik xəbər oxuyursan. Qəzetlərdə isə müsahibələr, araşdırmalar yer alır. Bu platformalar çevikdir, lakin dayaz. Ənənəvi media, xüsusən qəzetlər isə astagəl, lakin dərindir”.

E.Şıxlı Azərbaycan jurnalistikasının zəngin tarixə və ənənəyə malik olduğunu, lakin maddi baxımdan bu sahədə çalışanların adekvat şəkildə dəyərləndirilmədiyini deyir:

“Azərbaycan jurnalistikası zəngin ola bilər, amma jurnalistlərin maliyyə baxımından ələbaxımlı olmamağını istəyərdim. Maddi vəziyyətimiz elə olmalıdır ki, biz jurnalistlərin zəhmətinə adekvat qiymət verə bilək”.