Onu tanımayan xəstə atasına uşağı kimi baxan qız: "Anamdan sonra bu hala düşdü..." - ARZUNUN VAXTI

“Arzunun vaxtı” verilişinin budəfəki buraxılışında ağır həyat yükünü təkbaşına daşıyan Cəvahir Bilalovanın təsirli hekayəsi təqdim olunub.

Ailə həyatı qurmayan, anasını itirən Cəvahir hazırda kirayə evdə yaşayır və demensiya xəstəsi olan atasına özü qulluq edir.

Cəvahir Bilalovanın sözlərinə görə, atasının vəziyyəti anasının vəfatından sonra ağırlaşıb və bu onun yaddaşında ciddi pozuntulara səbəb olub.

O qeyd edib ki, xəstəlik səbəbi ilə atasının davranışları dəyişib, bəzən evi dağıdıb, evdən çıxıb gedib və onu tapmaq çətin olub.

“Bəzi vaxtlar çox çətin idi, anlamırdım. Elə bilirdim ki, mənə acıq edir. Çimizdirəndə əsəbiləşirdim. Özünü idarə edə bilmir. Hər şeyinə mən baxıram”, – deyə Cəvahir əlavə edib.

Cəvahir Bilalova atasının artıq onu tanımadığını, hətta bəzən onu anası kimi gördüyünü də vurğulayıb.

Onun sözlərinə görə, ətrafındakı insanlar atasını qocalar evinə yerləşdirib öz həyatını yaşamağı tövsiyə etsələr də, bu fikirlə razılaşmır.

“Mən də qocalacağam. Gənclərə nümunə olsun. Valideynlərinizi hər halında sevin, fərqi yoxdur, xəstədir, ya sağlam”, – deyə o qeyd edib.