"Kəpəz"in futbolçusunu küçənin ortasında bıçaqladılar | Hadisə ilə bağlı təcili məlumat - Baku TV

Gəncədə bıçaqlanma hadisəsi baş verib.

Hadisə şəhərin Müseyib Bağırov küçəsində qeydə alınıb.

“Kəpəz”in futbolçusu 23 yaşlı Veysəl Rzayev bıçaq xəsarəti alıb.

İlkin məlumata görə, o, həmin ərazidə dalaşan iki nəfəri ayırmaq istəyərkən yaralanıb.

Futbolçu dərhal Gəncə Şəhər Birləşmiş Xəstəxanasının nəzdində Akademik Zülfüqar Məmmədov adına xəstəxananın Təcili tibbi yardım şöbəsinə hospitalizasiya olunub.

Xəstəxanadan verilən məlumata görə, yaralı döş qəfəsinin sol tərəfinin daxilə keçən kəsilmiş-deşilmiş yarası ilə gətirilib:

“Xəstə əməliyyat olunub. Hazırda vəziyyəti keçirilmiş əməliyyata uyğundur. Müalicəsi Reanimasiya şöbəsində davam etdirilir”.

“Kəpəz” PFK-nın Media və marketinq direktoru bildirib ki, hadisə klubdan kənarda baş versə də, rəhbərlik futbolçunun yanındadır:

“Məşqçilər və rəhbərlik Veysəli xəstəxanada ziyarət etdilər. Məsələnin araşdırılmasında klub həm maraqlıdır, həm də əlindən gələn dəstəyi göstərir”. Faktla bağlı hüquq-mühafizə orqanları tərəfindən araşdırma aparılır.