"Olsa, alardım" - Satışı qadağan olunan pirotexniki vasitələri haradan alırlar? - Baku TV

Ölkə ərazisində hər il bayram ərəfəsində pirotexniki vasitələrin, fişənglərin və digər partlayıcı məmulatların qanunsuz satışı və istifadəsi halları müşahidə olunur. Küçələrdə və məhəllələrdə pirotexniki vasitələrdən istifadə edilməsi isə sakinlərin narahatlığına səbəb olur.

Baku TV mövzu ilə bağlı paytaxt sakinləri arasında sorğu keçirib.

Vətəndaşlar pirotexniki vasitələrin yaratdığı səs-küyün onları ciddi şəkildə narahat etdiyini bildiriblər.

“Onların istifadəsindən çox narazıyam, buna ehtiyac yoxdur”, – sakinlərdən biri söyləyib.

Daxili İşlər Nazirliyinin Mətbuat Xidmətindən bildirilib ki, sözügedən məhsullar əsasən azyaşlılar tərəfindən istifadə edilir və əksər hallarda bədbəxt hadisələrlə nəticələnir:

“Qanuna nəzər salsaq, pirotexniki, eləcə də yüksək səs yayıcı qabiliyyətə malik partlayıcı və tezalışan məmulatlar mülki dövriyyəsi məhdudlaşdırılmış əşyalar siyahısındadır və qanunla satışı qadağandır. Aşkar olunduğu təqdirdə dərhal satışdan çıxarılır və həmin şəxslər barəsində qanuna müvafiq tədbirlər görülür”.

Qeyd edək ki, İnzibati Xətalar Məcəlləsinin 442-ci maddəsinə əsasən, pirotexniki vasitələrin satışı ilə məşğul olan fiziki şəxslər 350 manatdan 500 manatadək, vəzifəli şəxslər 1650 manatdan 2200 manatadək, hüquqi şəxslər isə 4000 manatdan 5000 manatadək məbləğdə cərimə edilir.